聖方濟各華人天主堂

Giáo Xứ Thánh Phanxicô Xaviê

使用者工具

網站工具


zh-tw:mct5tt-b

聖週四:主的晚餐

進堂

各位親愛嘅兄弟姊妹:今日係聖週星期四,喺今晚嘅彌撒中,我哋悲喜交集;悲係因為喺最後晚餐中耶穌同宗徒要離別.喜係因為親切嘅愛已經達到高峰,駛人感動,因為主基督俾宗徒,俾信友團體留落咗獨一無二嘅寶藏,佢嘅聖體同寶血,另一方面由於耶穌謙遜嘅慈愛;佢竟然幫門徒洗腳,呢點又挑起我哋好大嘅感觸.耶穌喺最後晚餐中所做嘅兩件表現愛心嘅事,一陣喺彌撒中就會具體咁重演.耶穌所做嘅呢兩件事,目的係為愛,所以今日可以講係愛嘅日子,天主對人嘅愛,人對天主嘅愛,人與人之間嘅愛,希望今日嘅禮儀唔單只感動我哋嘅愛心,仲推動我哋實現具體嘅愛德工作,駛我哋明白基督嘅愛,同埋分享佢嘅愛.
請大家起立,參與呢台彌撒,請打開承恩第 頁,一齊唱進台詠.

經一

出谷紀敘述有關逾越晚餐嘅指示,呢個晚餐預報耶穌嘅最後晚餐,佢係救贖人類嘅羔羊.請打開聖週第50頁.

經二

彌撒聖祭係為紀念基督嘅死亡同復活,耶穌自己曾經命令我哋為紀念佢而祭獻,聖保祿喺今日嘅書信入面証明呢一點.請打開聖週第52頁.

講道後

濯足禮

喺死亡前幾個鐘頭,基督歸納佢嘅福音喺愛德嘅誡命中,另一方面,佢親自為門徒洗腳係俾我哋立表樣,要服務他人.神父而家喺我哋面前重演呢個洗腳禮,係為提醒我哋所謂愛德,係天主喺我哋人類中間嘅記號,同時我哋應該唔單只用言語,仲要以行動嚟實踐愛我哋嘅弟兄

信友禱文

主祭:各位兄弟姊妹:我哋好似當時嘅宗徒一樣,團聚喺自謙自卑嘅主基督周圍,我哋以服務嘅精神共同祈禱.

  1. 求主祝福天下全體主教,駛佢哋保存眾宗徒嘅訓誨,依照主嘅聖意領導付託俾佢哋照顧嘅信友.我哋同聲祈禱.
  2. 求主以聖寵嘅德能堅強傳教士嘅心志,督導各地民眾努力支持佢哋宣揚福音嘅工作.我哋同聲祈禱.
  3. 求主祝福嗰啲為服務大眾而擔任義務工作嘅人,駛佢哋領略喺愛護同幫助他人時,就係愛慕同幫助主.我哋同聲祈禱.
  4. 求主推動我哋效法佢只求服侍他人,而不求受他人服侍嘅生活.我哋同聲祈禱.

主祭:主耶穌,祢用宣講,用祢嘅善表教導我哋愛人,求祢恩賜我哋真誠彼此相愛.祢是天主,永生永王.

奉獻

基督為我哋立咗愛嘅榜樣,我哋亦向天主奉獻上愛德嘅禮物,今晚係由十二位宗徒代表我哋奉獻.

(領聖體後)

謝聖體

請大家坐,而家我哋做一個感謝聖體嘅祈禱.
上主,祢同祢嘅宗徒食完晚餐後親自幫佢哋洗腳,同埋講:「我以『主』同埋老師嘅身份都幫你哋洗腳,你哋都應該彼此洗腳,我俾你哋立咗一個表樣,為要你哋仿效我嘅行動」.主,我好慚愧,我並無聽從祢嘅勸告同命令,彼此相愛相助,我每次領咗祢嘅聖體後,仲係依然故我,自私自利,不忠於祢嘅命令.主,求祢幫助我,俾我明白祢愛人嘅命令,係要實行唔係虛言,駛我真係甘願為他人洗腳,為人服務.

聖體遊行

而家係聖體遊行,呢個係勝利嘅遊行,佢領導我哋到一個暫時嘅休息所,而唔係到基督嘅墳墓,聖週星期四唔係葬禮嘅守夜,而係一種對永生基督嘅朝拜,今晚我哋唔好等基督獨自受苦難,今晚同廳日我哋都繼續同佢一齊守夜.
遊行嘅次序係:十字架帶領,跟住係輔祭同神父,最後係十二位宗徒.全體教友企番喺原位



返回到 四旬期


頁面工具