聖方濟各華人天主堂

Giáo Xứ Thánh Phanxicô Xaviê

使用者工具

網站工具


zh-tw:mcll-b

聖枝主日

進堂

各位親愛嘅兄弟姊妹:而家輪到我哋擁護耶穌,我哋嘅君王,因主名而來嘅人.
我哋嘅聖枝遊行表示出耶穌復活同升天嘅勝利,預先指出耶穌苦難嘅意義同目的,我哋就要進入復活奧蹟嘅慶祝:我哋遊行嘅行動唔單只係一個信仰回憶嘅提示,我哋向救主耶穌同世界嘅君王做一個信德嘅行動.
今日神父祝聖呢啲樹葉,祝聖 嘅意義就係:平常呢啲樹葉喺自己嗰棵樹上嘅時候,一路生長,一路同大自然一齊讚美造物主,而家我哋呢啲樹葉喺我哋手上,表達出我哋心裡面讚美主嘅意向, 所以教友喜歡翻屋企保留,為強調呢個意向.讚美上主.而讚美上主係喺日常生活中舉行嘅.

請大家打開聖週第一頁,開始唱前導詠.

(唱完前導詠)致候禮:請打開聖週第五頁.

(致候禮完:祝聖聖枝) 而家神父祝聖聖枝,為表示紀念耶穌光榮咁進入耶穌撒冷.請打開聖週第六頁.

(祝聖聖枝後)分發聖枝時唱:基督得勝,第十頁.

(祝聖聖枝後讀福音前釋義) 我哋要聽嘅呢段福音,意思係我哋跟隨耶穌勝利咁進入世上嘅耶路撒冷,高興咁宣認佢係救主同君王,將來有一日我哋要跟隨佢進入天上嘅耶路撒冷.請打開聖週第七頁. 聖枝遊行

家陣我哋準備聖枝遊行,為表示紀念耶穌光榮咁進入耶穌撒冷.遊行次序係:首先係十字架,跟住係神父同輔祭,然後係要理班學生,聖詠團,最後係全體教友.

啟行前主禮唱:我們平安行走吧!

眾答:因基督之名,亞孟.

(遊行時) 請打開聖週禮儀11頁唱「西雍讚揚救主」.

經一

喺苦難期間,基督向我哋啟示佢嘅馴服同埋佢嘅毅力.依撒意亞先知喺經一,一早就預先描述咗呢一切.請打開聖週第十六頁.

經二

聖保祿宗徒喺經二特別著重基督接受死亡時嘅自由,同埋自願.請打開聖週第十七頁.

福音前 家陣請大家以一個充滿感情同埋信仰嘅心,聽耶穌受難嘅經過.今日嘅福音係三個人讀,一個敘述員講當時所發生嘅情形,另外一個讀群眾或者群眾之中一兩個人所講嘅對白,第三個會講出耶穌所講嘅說話.請大家打開聖週第35頁,特別集中精神留心吸收呢一段福音嘅內容.

信友禱文

主祭:各位兄弟姊妹:今日嘅禮儀歡呼主耶穌勝利進入耶路撒冷,號召我哋跟隨主耶穌走十字苦路.懷住知恩之心,同時以分擔主耶穌痛苦嘅心情,我哋懇切祈求.

  1. 天主喺基督嘅自謙同服從中顯露自己.求主恩賜佢嘅教會唔尋求人嘅讚賞,而多啲謙遜服務他人.我哋同聲祈禱.
  2. 喺十字架上嘅耶穌向天主聖父講出被疏忽嘅窮人嘅祈禱.求主幫助喺身體同心靈上痛苦嘅人,駛佢哋唔好對天主嘅仁慈失望.我哋同聲祈禱.
  3. 耶穌分別認識聖枝勝利嘅接待,同要佢死嘅人嘅嘲笑.求主助祐佢嘅人民能夠忠於自己嘅信仰,同忠於自己嘅良心.我哋同聲祈禱.
  4. 聖週喺我哋眼前重演天主教信仰嘅中心大事.求主俾所有嘅基督徒一齊團結,喺謙卑嘅耶穌內嚟慶祝呢個大慶節.我哋同聲祈禱.

主祭:主耶穌,十字奧蹟係慈愛嘅奧蹟,求祢助祐我哋每日生活呢個奧蹟,駛我哋能夠彼此相愛,互相幫助,駛我哋唔成為周圍嘅人嘅十字架.祢是天主,永生永王. 奉獻

耶穌光榮進入耶路撒冷,為代表人類向天主獻上最高嘅敬禮,我哋通過   教友家庭向天主奉上我哋自己.

(領聖體後)

謝聖體

請大家坐,而家我哋做一個感謝聖體嘅祈禱

主,基督,我甘心參加今日嘅聖枝遊行,為表示我希望祢進入我嘅生活之中.主,以祢新嘅精神,設駛我成為一個新嘅耶路撒冷,求祢將我嘅生活變為向祢一個不斷嘅歡呼歌,喺我身上,堅固我向祢嘅忠信同埋效忠.

禮成

我哋進入咗天主教徒偉大嘅一個星期,為跟隨超越死亡,帶俾我哋生命嘅天主,祝大家喺呢一個星期內完全生活喺基督嘅精神中.


四旬期


頁面工具